Kontsumobide

2022ko urtarrilaren 1etik aurrera, berritasun garrantzitsuak sartu dira indarrean kontsumitzaileen eta erabiltzaileen defentsaren arloan

Argitalpen-data: 

Ministroen Kontseiluak kontsumitzaileen egungo legea aldatzea onartu zuen apirilaren 27an. Lege horrek kontsumitzaileen posizioa indartzen du, eta kontsumo-eredu jasangarriagoen eta ekonomia zirkularraren aldeko apustua egiten du, ondasunen iraunkortasun handiagoa bermatuz. Kontsumo Ministerioaren arabera, kontsumo-araudi berriaren helburua produktuak berrerabiltzea, konpontzea eta birziklatzea da, bizi-zikloa zabaltzeko.

Kontsumitzaileen defentsari eta ondasunen salerosketa-kontratuei eta eduki edo zerbitzu digitalak emateari buruzko zuzentarauak gure ordenamendu juridikora ekartzearen ondorioz, 7/2021 Errege Lege Dekretuak zenbait aldaketa sartzen ditu Kontsumitzaileen eta Erabiltzaileen Defentsarako Lege Orokorraren Testu Bateginean , eta aldaketa horiek urtarrilaren 1etik aurrera sartuko dira indarrean. Aldaketa horien artean, honako hauek nabarmendu behar dira:

 BERMEA

Kontsumitzaileei babes handiagoa emateko helburuarekin, berme-epea 2 urtetik 3 urtera luzatzen da, produktu berri bat entregatzen denetik. Bigarren eskuko ondasunen kasuan alderdiek beste epe bat adostu dezakete, baina hau ez da inoiz  urtebetetik beherakoa izango.

Zerbitzu edo eduki digitaletarako epeak 2 urtekoa izaten jarraitzen du. Hala ere, kontratuak aurreikusten badu horiek etengabe hornitu behar direla, berme-epea hornitu behar diren epearen berdina izango da. Hornidura-aldia hiru urtetik beherakoa bada, erantzukizun-epea hiru urtekoa izango da, entregatzen denetik zenbatzen hasita.

EDUKI DIGITALAK

Araudi berriak eduki eta zerbitzu digitalak kontratatzera zabaltzen du bere aplikazio-eremua; izan ere, kontsumitzaileek ez dute prezio bat ordaintzen, baizik eta beren datu pertsonalak emateko konpromisoa hartzen dute.

Kategoria honetan jasotako produktuen artean daude, besteak beste, aplikazioak, liburu elektronikoak, joko digitalak, sare sozialak, musika-plataformak, programa informatikoak, lineako posta elektronikoa edo berehalako mezularitza-zerbitzuak.

Erregulazio horretatik kanpo geratzen dira 114. artikuluan jasotako zehaztapen guztiak, hala nola, kode irekiarekin funtzionatzen duten programa libreak, hau da, iturburu-kodea askatasunez partekatzen dutenak eta kontsumitzaileek programan modu irekian sartzen direnak.

ADOSTASUN-BALDINTZAK

Orain arte, kontsumitzaile batek erositako produktuarekin ados ez zegoela frogatzeko sei hilabete bazituen, 7/2021 Legea indarrean jarri ondoren, epe hori urtebetera luzatzen da eduki edo zerbitzu digitalerako, edo bi urtera ondasun bat entregatzeko.

Horrela, ulertuko da ondasuna edo zerbitzua entregatzeko unean adostasun-faltak bazirela ondasuna entregatu eta hurrengo bi urteetan edo eduki edo zerbitzu digitala hornitu eta hurrengo urtean;  beraz, enpresariak edo ekoizleak frogatu beharko du produktuarekin edo zerbitzuarekin arazorik ez dagoela kontsumitzaileak epe horien barruan desadostasuna adierazten badu.

Orain, baldintza objektibo eta subjektibo batzuk betez zehaztuko da kontratuarekiko adostasuna, instalazioa eta iraunkortasuna barne. Ondasun, zerbitzu edo eduki digitalaren entregak baldintza horiek betetzen ez baditu, saltzaileak erantzun egin beharko du, eta ados jarri beharko da kontsumitzailearekin, produktua konpondu edo ordezkatuz.

Konponketa edo ordezkapen horrek doakoa izan behar du (bidalketa edo garraioa barne), arrazoizko epe baten barruan egin behar da eta kontsumitzaileari desegokitasun handiagorik eragin gabe. Gainera, konponketa edo ordezkapena ez badira erremedio eraginkorrak edo posibleak, kontsumitzaileak eskubidea izango du prezioa murrizteko edo kontratua suntsiarazteko eskatzeko.

ZERBITZU TEKNIKOA ETA ORDEZKO PIEZAK

Ondasun bat fabrikatzeari uzten zaionetik gutxienez 10 urteko epean bermatu beharko da ordezko piezak daudela eta salmenta osteko zerbitzu tekniko egokia dagoela. Konponketetan ezin izango da ordezkoen prezioa igo.

Horrela, Europako Parlamentuak 2020ko azaroaren 25eko Ebazpenean eskatutako produktuak konpontzeko eskubiderantz egiten da aurrera.