Zorrek ez zaitzatela harrapa

Esan dezakegu mailegu batzuk ezinbestean eskatu behar izaten direla (larrialdikoak, ustekabeko gastuak), baina beste batzuk ez dira beharrezkoak edo lehentasunezkoak ez diren erosketetarako izaten dira (kapritxoak edo erosketa konpultsiboak). Gero eta errazagoa da horiek lortzea, klik eginez, baina ez utzi seduzitzen, lehenik eta behin, pentsatu zure egoera ekonomikoan eta ordaindu beharko dituzun komisio edo interesak. Mailegua hartzea ez da doakoa, mailegua hartzeak esan nahi du ematen dizun entitateak interesak kobratuko dizkizula horregatik. Beraz, UTBa (Urteko Tasa Baliokidea) zenbat eta txikiagoa izan, orduan eta diru gutxiago kostako zaizu zorra itzultzea. 

Mailegua eskatuko baduzu… 

• - Eska ezazu egonkortasun ekonomikoa duzunean.
• - Ez eskatu behar duzuna baino gehiago.
• - Ez eskatu mailegurik gastu arruntei aurre egiteko (argia, elikadura, ura...)
• - Kalkula itzazu zure diru-sarrerak eta gastuak, mailegua eska ote dezakezun jakiteko. Horrela, ez zara ezin ordainduta ibiliko, ez zaizu zorra pilatuko interesak biderkatu direlako eta ez zara irtenbide zaila duen espiral zoro batean sartuko.
• - Ez erabili hileko soldataren % 35 baino gehiago zor guztiak ordaintzeko.
• - Konpara itzazu aukera guztiak eta hautatu baldintza onenak eskaintzen dizkizuna. 

Atzera egiteko eskubidea 

Kontsumo-mailegu bat eskatzen dugunean, itzuli dezakegu? Egia esan, kontsumo-mailegu batean atzera egin dezakegu, iritzia aldatu eta atzera egin, azalpenik eman gabe. Legeak babesten gaitu. Atzera egiteko eskubidea kontsumo-maileguetan ere badago.
Baina kontuz! Dena ez da erraza. Atzera egiteko eskubidea 200 euro eta 75.000 euro arteko kontsumorako mailegu eta kredituei aplikatzen zaie, eta argi eta garbi zehaztuta egon behar du kontratuan. Eskumen hori erabiliko bazenu (mailegua erabili aurretik), kontratuak ez luke ondoriorik izango; hau da, ez litzateke mailegurik egongo. Eskubide hori baliatzeko, ez diozu inolako azalpenik eman behar erakundeari.