Erosketei buruzko ohiko galderak

Duela bi hilabete ordenagailu bat erosi nion partikular bati, eta orain ez dabil ongi. Berarekin harremanetan jarri naiz, baina esan dit ez dela haren kargu egiten. Zer berme dute bigarren eskuko produktuek?

Bigarren eskuko produktuetan gutxieneko bermea urtebetekoa da, baina profesionalek saldu behar dituzte. Partikularrek saldutako produktuen kasuan, ez dute lege-bermerik, ez baita kontsumo-araudia aplikatzen, Kode Zibila baizik.

Lehen begiratuan ikusten ez diren akatsei erantzuteko betebeharra ezartzen dio legeak saltzaileari. Epaitegian demanda bat aurkezteko epea sei hilabetekoa da, produktua entregatzen denetik hasita.

Merkataritza elektronikoa: Duela hilabete eta erdi, Internet bidez argazki-kamera bat erosi nuen, eta oraindik ez zait iritsi. Zer eskubide ditut?

Online dendak erosketa egin eta gehienez ere 30 eguneko epean entregatu behar ditu produktuak, ez bada beste epe bat adostu. Epea igarota erosi duzuna iristen ez bazaizu, enpresarekin harremanetan jarri behar duzu zer gertatu den jakiteko. Produkturik ez duela edo bidaltzeko espero baino denbora gehiago beharko duela esaten badizu, dirua berreskuratzeko edo produktua iritsi arte itxaroteko aukera izango duzu. Adostutako epe gehigarria igarota, ez bada paketea iristen, eskubidea duzu, berriz ere, kontratua deuseztatzeko edo dirua lehenbailehen jasotzeko.

Eskaera bertan behera uztea erabakitzen baduzu eta enpresak onartzen ez badu edo produktuagatik ordaindu duzun dirua jasotzen ez baduzu, erreklamazioa aurkez dezakezu.

Internet bidez musika-ekipo bat erosi diot Alemaniako enpresa bati, baina produktua jasotzean eta probatzean, egiaztatu dut ez dabilela. Enpresarekin harremanetan jartzen saiatzen ari naiz, zure webgunean dauden harremanetarako datuen bidez, baina ez dut erantzunik jaso. Zer egin dezaket?

On line auzien Europako plataformara jo dezakezu (Online Dispute Resolution – ODR). Online gatazkak azkar, zuzen eta judizioz kanpo konpontzeko tresna bat da. Helburua da kontsumitzaileei eta profesionalei laguntzea Internet bidez produktuak erostean edo zerbitzuak kontratatzean sor daitezkeen gatazkak konpontzen.

AECOSAN agentziari atxikitako Kontsumitzailearen Europako Zentroa (KEZ) izango da plataformak Espainian izango duen harremanetarako gunea, eta eskatzen duenari laguntza eta babesa emango dio erreklamazioak aurkezteko, ODRren bidez.

http://ec.europa.eu/odr webgunearen bidez, arazoak eta gaizki-ulertuak konpon ditzakezu zeure hizkuntzan. Zuzenean enpresarekin harremanetan jarri ahal izango zara 90 eguneko epean auzia konpontzeko, edo gatazkak konpontzeko erakunde bati agindu ahalko diozu zuregatik konpon dezala. Enpresak 30 egun izango ditu auziak ebazteko zein erakunde erabiliko duen adosteko enpresarekin.

Europako plataforma hori honako kasu hauetan bakarrik erabili ahal izango duzu:

  • EBko herrialde batean edo Norvegian, Islandian edo Liechtensteinen bizi bazara,
  • Enpresa aurreko tokietako batean kokatuta badago eta
  • Zure erreklamazioa online erositako produktu edo zerbitzu bati buruzkoa bada.
Merkataritza elektronikoa: Lineako erosketa bat egin nuen arropa-denda batean, baina eskatu nituen hiru gaietako bi besterik ez zitzaizkidan heldu, fakturan gai guztiak jasota zeuden arren. Nola frogatu dezaket egiazki bi iritsi zitzaizkidala?

Dendari lehenbailehen eman behar diozu gertatutakoaren berri; hori dela-eta, garrantzitsua da erosketa egin aurretik ziurtatzea enpresarekin harremanetan jartzeko datuak dauzkazula: helbide fisikoa, posta elektronikoaren helbidea edo telefono-zenbakia, adibidez. Hala ere, gertatu zaizuna jakinarazteko, komeni da jakinarazpena idatziz jasotzea ahalbidetuko dizun metodoren bat erabiltzea aurrena (adibidez, bitarteko elektroniko bat). Halaber, salgaiak biltzeko kutxari argazkiak ateratzea aholkatzen dizugu.

Arazoaren berri eman ondoren erantzunik jasotzen ez baduzu edo erantzunarekin pozik geratzen ez bazara, jar ezazu erreklamazioa Kontsumobiden edo kontsumitzaileen arretarako edozein bulegotan.

Gogoratu Internet bidez erosketa bat egiten duzun aldiro jarri behar diozula arreta, harremanetan jartzeko datuei ez ezik, informazio honi ere: produktuaren edo zerbitzuaren ezaugarriak, prezioa eta bidalketa-gastuak (baldin badaude), ordaintzeko modua, entregarako epea eta modua eta uko egiteko eskubideari buruzko informazioa.

Erosketak: Jatetxean txartelarekin ordaindu dut eta, kontua begiratu dudanean, menua bi aldiz kargatu didatela ikusi dut. Nori erreklamatuko diot?

Zure bankuarekin jarri behar duzu kontaktuan, bankuak eman baitzizun txartela. Horretarako, gehienez ere 13 hilabeteko epea duzu kargua egin zizuten egunetik kontatzen hasita, baina lehenbailehen jakinaraztea komeni da.

Merkataritza elektronikoa: Motxila bat erosi dut Internet bidez, eta itzuli egin nahi dut. Promozioan zegoen, eta baldintzetan aipatzen zenez, ?beste produktu baten truke aldatzea soilik onartuko da?; legezkoa al da salgaiaren itzulketa ez onartzea?

Ez. Urruneko erosketetan, produktu bat itzultzeko edo zerbitzu bati baja emateko eskubidea duzu inolako penalizaziorik gabe eta zure erabakia justifikatu behar izan gabe.Horretarako, 14 egun natural dituzu. Dena den, badira salbuespenak: neurrira egindako artikuluak, elektronikoki hornitutako fitxategi informatikoak, edo zigilua kendutako diskoak, esaterako.

Merkataritza elektronikoa: Partikular bati mugikor bat erosi diot interneten bidez, baina ez dit bidali. Ba al du erantzukizunik web-orriak?

Web-orriaren titularrak bitartekaritza-zerbitzua baino ez du egiten eta, kasu horretan, zerbitzua ematen dituztenek ez daukate, printzipioz, transmititzen dituzten edukiak gainbegiratzeko betebeharrik, baina agintarien esanak bete behar dituzte, zerbitzu bat emateari uzteko edo eduki bat saretik kentzeko eskatzen badiete. Laburbilduz, webgunea ez da ostatatuta duen legez kontrako edukiaren erantzule izango, haren bidez egiten diren jarduerak legez kontrakoak direla ez badaki.

Araudia: 34/2002 Legea, uztailaren 11koa, Informazio Gizartearen Zerbitzuei eta Merkataritza Elektronikoari buruzkoa (13. artikulua eta hurrengoak).

Azken berrikuspena: 2017ko azaroa

Likidazioa: Nolakoak dira likidazioko salmentak?

Likidazioko salmentak hainbat arrazoirengatik egin daitezke:

  • Merkataritza jarduera erabat, partzialki, behin-betiko edo aldi baterako uztea.
  • Negozioa aldatzea, ixtea edo lokala eraldatzea.
  • Merkataritza jardueraren garapen normala eragozten duen edozein ezinbesteko arrazoi.

Salmenta-modalitate honetan eskaini daitezkeen produktuak merkataritza-establezimenduaren izakinak dira.

Araudia: 7/1996 Legea, urtarrilaren 15ekoa, Txikizkako Merkataritza Antolatzekoa (30. eta 31. artikuluak).

Azken berrikuspena: 2016ko martxoa

Prezioak: Eskaintza bat ikusi dut liburuxka batean, baina dendan produktu hori garestiago dago, zer egin dezaket?

Publizitatea loteslea da, alegia, dendak publizitatean iragarri duena bete beharra dauka. Gorde itzazu beti publizitateko liburuxkak edo gainerako dokumentuak, hura eskuan dela eskainitakoa bete dezaten eskatu ahal izateko.

Araudia: 1/2007 Legegintzako Errege Dekretua, azaroaren 16koa, Kontsumitzaileak eta Erabiltzaileak Defendatzeko Lege Orokorraren eta beste lege osagarri batzuen Testu Bategina onartzen duena (61. artikulua). 

Azken berrikuspena: 2017ko azaroa

Prezioak: Etiketan ageri zena baino prezio handiagoa kobratu didate, argudiatuz BEZik gabeko prezioa zela, zuzena al da?

Ez. Iragarritako salneurria beti produktuaren edo zerbitzuaren osoko prezioari dagokiona izan behar du. Beraz, prezio guztiak BEZa barne dutela erakutsi behar dira.

Araudia: 1/2007 Legegintzako Errege Dekretua, azaroaren 16koa, Kontsumitzaileak eta Erabiltzaileak Defendatzeko Lege Orokorraren eta beste lege osagarri batzuen Testu Bategina onartzen duena (60. artikulua).

Azken berrikuspena: 2017ko azaroa

Merkealdia: Zer baldintza bete behar dituzte merkealdian dauden produktuek?

Artikuluak merkealdi-garaiaren aurretik zutena baino prezio merkeagoan eskaini behar dira. Produktuek kalitate berbera izan behar dute, eta argi eta garbi adierazi behar dira merkealdiaren aurreko prezioa eta prezio berria.

Araudia: 7/1996 Legea, urtarrilaren 15ekoa, Txikizkako Merkataritza Antolatzekoa (24., 25. eta 26. artikuluak).

Azken berrikuspena: 2016ko martxoa

Merkealdia: Erabil al dezaket erosketa-txartel bat merkealdi-garaian?

Ez dago txartela merkealdian erabiltzea debekatzen duen legezko arrazoirik, baldin eta txartelean ez bada hori adierazten duen inolako oharrik agertzen.

Araudia: 7/1996 Legea, urtarrilaren 15ekoa, Txikizkako Merkataritza Antolatzekoa.

Azken berrikuspena: 2014ko ekaina

Saldoak: Zer da saldoen salmenta?

Saldoak narriatutako produktuak edo erabiltzen ez direnak dira. Produktu horiek ohiko baldintzetan saldu ezin direnez, dezentez merkeago eskaintzen dira. Enpresaren obligazioa da salmenta-mota honi ekiteko zer arrazoi eta inguruabar dituen zehaztu behar izatea.

Saldoak ez badie eragiten merkaturatuta dituen produktu guztiei, saldo gisa eskainitako salgaiek gainerakoetatik aparte egon behar dute. Saldoetan, erreklamazioa egin daiteke, soilik, produktua erosi genuenean erakutsi ez zizuten beste akats edo hutsen bat aurkitzen baldin baduzu.

Araudia: 7/1996 Legea, urtarrilaren 15ekoa, Txikizkako Merkataritza Antolatzekoa (28. eta 29. artikuluak).

Azken berrikuspena: 2016ko martxoa