Kontsumo-arloko salaketak nola egin

Salaketaren bidez, kontsumo-alorreko arau-hauste administratiboa izan daitekeen gertaera bat jakinarazten diozu Administrazioari, nahiz eta hark zuri kalterik ez eragin. Salaketa jaso eta gero, Administrazioko ikuskapen- eta kontrol-zerbitzueek beharrezko egiaztapenak egingo dituzte. Beharrezkoa bada, Administrazioak neurriak hartu edota kasuan kasuko zehapenak ezarriko ditu, arau-hausteak prebenitu eta zuzentzeko, kontsumitzaile guztion interesa babeste aldera.

Salaketa online jarri nahi baduzu, egin dezakezu erreklamazioak online egiteko web-orrialdearen bidez.  

Nork egin dezake salaketa?

Edozein kontsumitzailek edo erabiltzailek, salatutako gertakariek zuzen-zuzenean eragiten ez badiote ere. 

Nola egin dezakezu salaketa?

Idazki baten bidez. Datu hauek agertu behar dira, ahalik eta erarik osoenean:

• Salatzailearen datuak: izena, helbidea, NANa/pasaportea, telefonoa.
• Salatutako enpresa, establezimendu edo profesionalaren datuak: izena, helbidea, IFK, telefonoa.
• Salatu nahi diren gertaeren zehaztasunak, ikerketa era egokian bideratzen laguntzeko.
• Data.
• Sinadura.

Salaketa-idazkiarekin batera komeni da froga gisa erabili daitekeen edozein dokumentu aurkeztea (kontratua, ordainagiria, tiketa, publizitatea).

Nora bidali behar duzu salaketa?

Kontsumo-erakunde hauetariko batera:

• Kontsumobideren lurralde-zerbitzura (dagokiona): Araba, Bizkaia eta Gipuzkoa.
• Zure bizilekuari dagokion Kontsumitzaileen Informaziorako Udal Bulegora (KIUB).