- Gaur hasiko da Kontsumobide Kontsumoko Euskal Institutuaren eta Euskal Herriko Unibertsitatearen (EHU) arteko lankidetza-hitzarmenari esker abian jarri eta bigarren edizio honekin aitzindari bilakatu den graduondokoa
- Ikastaro hau beharrezko prestakuntza gisa sortu da profesionalak kontsumitzaileen eta erabiltzaileen eskubideen defentsan espezializatzeko, gizarte digitalaren erronka berrietara eta kontsumo-ohituretako aldaketa azkarretara egokituta
Vitoria-Gasteiz, 2026ko urriaren 13a.- Gaur hasiko da Kontsumo Zuzenbideko Aditu Ikastaroaren bigarren edizioa, Euskal Herriko Unibertsitateko (EHU) graduondoko eskaintzan txertatuta. Titulu hau Kontsumobide Kontsumoko Euskal Institutuaren (Eusko Jaurlaritzako Turismo, Merkataritza eta Kontsumo Sailaren mende dagoena) eta EHUren arteko lankidetza instituzionaletik sortu da, erantzukizun soziala, jasangarritasuna, balioetan oinarritutako hezkuntza eta ezagutza-transferentzia sustatzeko asmoz. Ekimenak Unión de Consumidores de Euskadi (UCE) eta Euskal Kontsumitzaileen Alkartearen (ACUV / EKA) parte-hartzea ere badu.
Abian jarri zenetik, graduondoko honen funtsezko helburua kontsumoaren esparruan espezializazio-eskari historiko bati erantzuna ematea izan da. Irekiera instituzionalean, Ana María Sánchez Herráez Kontsumobide Kontsumoko Euskal Institutuko zuzendariak, Enara Garro EHUko Zuzenbide Fakultateko dekanoarekin batera, azpimarratu dute erakundeen arteko koordinazioa ezinbestekoa dela herritarren babesa indartzeko. Zuzendariaren hitzetan, graduondoko hau «funtsezko tresna da talde profesionalei konpetentzia egokiak emateko, etengabe eraldatzen ari den gizarte batean erronka eta eskubide berriei bermeekin aurre egiteko».
Prestakuntza multidisziplinarra merkatuko erronka berrien aurrean
Kontsumo Zuzenbideko Aditu Ikastaroa ez dago pentsatuta soilik arlo juridikoko profesionalentzat; bestelako diziplinetara ere zabaltzen da, baita administrazio publikoko langileengana, sektoreko elkarteengana eta bezeroen eskubideen ezagutza eta hedapena finkatzeko interesa duten dibulgazio-adituengana ere, kontsumitzen dutenen defentsarekiko konpromiso irmoarekin.
Gainera, programak arreta berezia jarri nahi du lankidetza publiko-pribatuan eta enpresen inplikazioan, jarduera komertzial egokiak eta herritarrekiko errespetuzko betetze arauemailea sustatuz. Bigarren edizio hau abian jarrita, funtsezko tresna bat finkatu da etorkizuneko espezialistak prestatzeko, eraldaketa teknologikoaren eta erosketa-ohitura berrien ondoriozko erronkei aurre egiteko.
