Joan edukira
Letra-tamaina: 100% Gaia: light Testuaren tartea: 0

Kontsumobidek estetika- eta hortz-kliniken itxierek kalte egindako pertsonei beren eskubideen eta lotutako finantzaketak eskaintzen dien babesaren berri eman die.

Argitalpen-data: 

Kontsumobide-Kontsumoko Euskal Institutuak jarraitu beharreko urratsak gogorarazi ditu Ixia klinikak, Dorsia taldeak (Alma Life eta Aureva Clinics markekin ere jardun duena) edo Aestes Dental, S.L.ren (Vivanta edo Oralis) hortz-zentroek zerbitzua eten ondoren. Tratamenduari lotutako kreditu bat izatea da ordaintzeke dauden kuotak gelditzeko eta finantza-erakundeari eman ez diren zerbitzuengatik ordaindutako dirua itzultzea eskatzeko bide legala.

Kontsumobidek estetika- eta hortz-kliniken itxierek kalte egindako pertsonei beren eskubideen eta lotutako finantzaketak eskaintzen dien babesaren berri eman die.

Kontsumobide-Kontsumoko Euskal Institutuak informazioa eman die herritarrei eta Euskadiko hainbat estetika- eta hortz-kliniketan izandako azken itxierek eta zerbitzu-etenek kalte egindako pertsonei beren eskubideak defendatzeko eta ordaindutako zenbatekoak erreklamatzeko dituzten bideen inguruan. Kalteak jasan dituzten erakundeen artean daude Ixia estetika-zentroak, Dorsia taldea (Alma Life eta Aureva Clinics izenekin ere jardun duena) eta Aestes Dental, S.L. enpresako hortz-klinikak (Oralis eta Vivanta markak).

Osasun- eta estetika-zentro horietan jarduera gelditu denez, Kontsumobidek mezu garbia helarazi nahi du zerbitzu horiek zer baldintzatan kontratatu ziren kontuan hartzeak duen garrantziari buruz. Alde horretatik, Institutuak azpimarratu du lotutako finantzaketa batera jo izana dela, itxiera-egoera horien aurrean, dirua ez galtzeko berme juridiko nagusia.

Lotutako finantzaketa, kontsumitzailea babesteko berme gisa

Kontsumo Kredituaren Kontratuen Legearen arabera, lotutako kreditutzat hartzen da zerbitzu-emateko kontratu zehatz bat finantzatzeko soilik balio duena, bi akordioek merkataritza-unitate bakarra osatzen dutenean.

Kontsumo orokorrean aldi batean guztiak ordaintzea izaten bada ere ohikoena, segida jarraituko prestazioetan edo iraupen luzeko tratamenduetan, lotutako finantzaketak babes-ezkutua gisa jarduten du ustekabeko itxieren aurrean:

  • Ordainketa bertan behera uzteko eskubidea: Kontsumitzaileak eskubide legala du banku-ordainagiriak edo etorkizuneko kuotak berehala gelditzeko eskatzeko, klinikak zerbitzua betetzen ez badu.
  • Ordaindutakoa itzultzeko eskubidea: Finantza-erakundeari zuzenean eska dakioke egiteke geratu den tratamendu-parteari dagozkion ordaindutako zenbatekoak itzultzeko.
  • Finantziazioa, aldi batean ordaintzearen aldean: Aitzitik, tratamendu osoa aldi batean edo lotu gabeko prestamo pertsonalen bidez ordaindu zutenek enpresari zuzenean erreklamatu behar diote edo hartzekodunen lehiaketara jo behar dute; prozedura hori konplexuagoa da eta ez du berme handirik eskaintzen dirua berreskuratzeko.

Kaltedunek jarraitu beharreko urratsak

Kontsumobidek honako prozedura hau jarraitzea gomendatzen die estetika- eta hortz-zentroen itxierek kalte egindako pertsonei:

  1. Klinikari aurretiazko erreklamazioa egitea: Idazki bat aurkeztea klinikaren edo merkatari titularren aurrean (burofax bidez edo jasota geratzeko bestelako bideren bat erabiliz), kontratua betetzeko edo kontratua betetzen ez denez bertan behera uzteko eskatzeko, bai eta historia klinikoaren edo tratamenduaren espedientearen kopia berehala emateko ere.
  2. Erreklamazioa finantza-erakundearen aurrean: Zentroak itxi egiten badu edo erantzuten ez badu, lotutako kreditua sinatu zen erakundearekin idatziz jarri behar da harremanetan, honako hau eskatzeko:
    • Ordaintzeke dauden kobrantzak gelditzea.
    • Jaso gabeko zerbitzuengatik ordaindutako zenbatekoak itzultzea.
  3. Dokumentazioa gordetzea: Ordainketen egiaztagiri guztiak, kontratuak (klinikarenak zein finantza-erakundearenak, izen soziala edo komertziala egiaztatuz), eskuorriak, aurrekontuak eta tratamenduaren egoera edo aurrerapen-maila egiaztatzen duen edozein froga edo dokumentu gordetzea.
  4. Kontsumobide edo KIUB-etara jotzea: Finantza-erakundeak erreklamazioari epean erantzuten ez badio, kalte-duna Kontsumobidera edo bere udalerriko Kontsumitzailearen Informaziorako Udal Bulegora (KIUB) joan daiteke bere erreklamazioa administrazio-bidetik bideratzeko.